Ыам ыйын 22 күнүгэр   ытык аҕа саастаах дьоммут сыл бастыҥ кэмин — Самаан сайыны уонна Ньукуолун күнүн айылҕа маанылаах хонноҕор үөрэ-көтө көрүстүлэр. Элбэҕи көрбүт, олоҕу билбит кырдьаҕастарбыт сир ийэ күөххэ үктэммит үөрүүлээх күннэригэр сиэри-туому тутуһан, айылҕалыын ситимнэстилэр.

Тэрээһин сахабыт сиэринэн аал уоту аһатыынан, сир ийэҕэ, айыыларга сүгүрүйүү алгыһынан саҕаланна. Мустубут дьон бары үтүө санааны үллэстэн, кэскиллээх олоҕу сирдиир саламалары үөрэ-көтө ыйаатыбыт. Бу уйгулаах сайыммыт илгэлээх кэлиэҕэ, дьоҥҥо-сэргэҕэ үгүс үөрүүнү аҕалыаҕа диэн эрэл санаа хас биирдии киһи сүрэҕин сылытта.

Үөрүүлээх чаас үрүмэлиир салгыҥҥа дорҕоонноох оһуохайынан салҕанна. Аҕа саастаахтарбыт эдэр саастарын санаан, илии-илииттэн тутуһан, оһуохай матыыбыгар уйдаран таһаарыылаахтык үҥкүүлээтилэр,  көрдөөх оонньууларга көхтөөхтүк кытыннылар. Кыайыылаахтарга уонна бастыҥ көрдөрүүлээхтэргэ өйдөбүнньүк бэлэхтэр туттарылыннылар.

Тэрээһин сүрүн чааһынан минньигэс астаах, арыылаах саламааттаах уонна нэһилиэкпит байанайдаах булчуттарыттан кус миининэн күндүлээһин буолла.   Ытыктыыр аҕа саастаах дьоммут маннык айылҕаҕа тахсан сынньанартан санаалара көтөҕүллэн, тэрийээччилэргэ ис сүрэхтэн тахсар махтал тылларын тиэртилэр

Бу тэрээһин нэһилиэкпит дьонун сомоҕолоото, өбүгэ үгэһин сыаналааһыны уонна аҕа көлүөнэҕэ убаастабылы өссө төгүл бигэргэттэ. Самаан сайыммыт хас биирдии ыалга уйгуну-быйаҥы, чэгиэн туругу аҕаллын!