Кулун тутар 28 күнүгэр Таатта улууһун Уолбатыгар Саха Сиригэр Аҕалар күннэригэр анаммыт, эр дьон эрчимэ, сымсата тургутуллар «Кыһыны атаарыы» улахан күрэхтэһиитэ үрдүк таһымнаахтык буолан ааста. Быйыл бу тэрээһин иккис төгүлүн ыытыллан, нэһилиэк олохтоохторун уонна ыалдьыттарын түмэр үтүө үгэскэ кубулуйда.

Күрэхтэр программалара олус тыҥааһыннаах уонна интэриэһинэй буолла:

• «Алтан сүгэ ааттаахтара»: Бу күрэххэ эр дьон төһө кыахтаахтарын,  сымсаларын көрдөрдүлэр. Төрүт үгэһи тутуһан, күүһү-уоҕу уонна сатабылы ирдиир сорудахтары толоруу көрөөччүлэри сөхтөрдө. 5 түһүмэх түмүгүнэн Айал Товаров Кыайыылааҕынан ааттанна уонна оттук маһынан наҕараадаланна. 
• «Тимир дохсун»: Буранынан уонна мотособаканан куоталаһыы тыа сирин олоҕун аныгы тэтимин биллэрдэ. Күүстээх тимир көлөлөр хаардаах толоону устун сурулатыылара, эр дьон суоппардыыр маастарыстыбалара дьон кутун тутта. Буранынан күрэххэ уопсайа 5 буран кыттан кыайыылаахтар билиннилэр. Ол курдук: 1 миэстэ былырыыҥҥы күрэх кыайыылааҕа Валерий Софронов, 2 миэстэ - Владимир Басов, 3 миэстэ - Макар Еремеевич Неустроев буолан анал бириистэринэн наҕараадалннылар.

  Быйылгы тэрээһин биир сүрүн ураты уонна сонун күрэҕинэн  мотособакалары сүүрдүү буолла. Былырыыҥҥы күрэххэ «Бураннар» эрэ куоталаһар эбит буоллахтарына, быйыл тыа сирин олоҕор киэҥник киирбит, үлэҕэ-хамнаска уонна бултка солбуллубат көмөлөһөөччү буолбут «тимир ыттар» бэйэ-бэйэлэрин кытта күөн көрсүстүлэр.

  Мотособаканан сүүрдүү саҥа сүүрээн буолан, көрөөччүлэри олус интэриэһиргэттэ. Бу көлө кыра да буоллар, сымсата, тыаҕа-хонууга барар кыаҕа уонна суоппар маастарыстыбатын ирдиирэ күрэххэ туспа тыын уктулар. Кыттааччылар хаардаах сиринэн мотособакаларын сатабыллаахтык салайан, түргэн тэтими көрдөрөн, «Тимир дохсун» күрэҕин өссө тыҥааһыннаах уонна кэрэхсэбиллээх оҥордулар.

  Бу саҥа көрүҥ эбиллибитэ Уолбаҕа ыытыллар «Кыһыны атаарыы» тэрээһинэ сылтан сыл кэҥээн, аныгы кэм тэтимигэр сөп түбэһэн иһэрин туоһулуур. Күрэх түмүгэр кыайыылааҕынан Иннокентий Боппосов таҕыста уонна улуус мунньаҕын депутата Алексей Аржаков туруорбут 20 л. бензинынан наҕараадаланна. 2 миэстэ - Иван Мосоркин, 3 миэстэ - Валерий Луковцев. 

• Кэрэ аҥардарга кууллаах сахары көтөҕүү: Тэрээһин биир  долгутуулаах түһүмэҕинэн далбар хотуттар ортолоругар ыытыллыбыт абсолютнай чемпионат буолла. Саха дьахтарын күүстээх санаатын, тулуурдааҕын көрдөрөн, кууллаах сахары үөһэ анньан таһаарар кэрэ аҥардар күрэхтэһиини өссө киэргэттилэр. Ол курдук 1 миэстэҕэ Майя Неустроева тахсан куул сахар бирииһи тутта. 

• Тэрээһин биир саамай истиҥ уонна көхтөөх түһүмэҕинэн кырачааннар күрэхтэһиилэрэ буолла. Оҕолор тоҥуу хаарынан сүүрэн куоталаһыылара дьон кутун тутта, көрөөччүлэри барыларын кынаттаата.

  Халыҥ хаары кэһэн, бэйэ-бэйэлэрин кытта сымсаҕа, түргэҥҥэ күрэхтэһэр оҕолор Саха сирин кытаанах айылҕатыгар үөрэммит, чэгиэн-чэбдик буола улаатан эрэллэрин көрдөрдүлэр. Бу күрэх оҕолорго тулуурдаах буоларга, хаардаах толооҥҥо охтубакка иннин диэки дьулуһарга үөрэтэр, эти-хааны эрчийэр ураты суолталаах. Маннык тэрээһиннэр оҕо кыра эрдэҕиттэн төрөөбүт дойдутун айылҕатын таптыырыгар, эр хоһуун буола улаатарыгар улахан тирэх буолаллар. Кыайыылаах Ксюша Егорова минньигэс бирииһинэн наҕараадаланна. 

Бүгүн халлааммыт төһө да хаардаах былыттаах буоллар, Уолба сиригэр олохтоохтор уонна ыалдьыттар итии-истиҥ сыһыаннара, күрэхтэһии тыҥааһыннаах тыына тулалыыр эйгэни сыратта. Күн уота былыт быыһынан күлүмнээбэтэр да, кыттааччылар харахтарыгар чаҕылыспыт кыайыыга дьулуур уонна көрөөччүлэр көхтөөх ытыс таһыныылара дьиҥнээх бырааһынньык салгынын үөскэттилэр

Бүгүҥҥү тэрээһиммит сүрүн бириистэрин  спонсордарыгар нэһилиэкпит дьаһалтатыгар уонна улуус мунньаҕын депутата Алексей Аржаковка, күрэхтэри иилээн-саҕалаан ыыппыт Александр Винокуровка, тэрээһиҥҥэ көмөлөспүт Айтал Семеновка  махтанабыт.