Алтынньы 1 күнүттэн 10 күнүгэр диэри норуот айымньытын киинэ уонна Уолбатааҕы ветеран Советын көҕүлээһиннэринэн Аҕам саастаах дьоммутугар аналлаах "Көмүс саас мичээрэ" тэрээһин буолан ааста. Декада  нэһилиэк баһылыга Василий Петрович Рахлеевы кытта көрсүһүүттэн саҕаланна. Салҕыы былааннаммыт тэрээһиннэр олус көхтөөхтүк аастылар. Ол курдук, дьиэтээҕи түбүктэн аралдьытан норуот айымньытын дьиэтигэр  мустан корн-холл, дартс, лото оонньуулара буоллулар,  Макар Хара аатынан модельнай библиотека үлэһитэ Екатерина Юлиевна аҕам саастаахтары аахпыт кинигэлэрин тула кэпсэтии ыытта уонна "Тыгын Дархан" киинэни көрдөрдө. Маны таһынан, декада иһинэн доруобуйаҕа эмиэ болҕомто уурулунна. Ол курдук,  улуус кииниттэн терапевт быраас кэлэн нэһилиэк фельдшера Мария Иннокентьевналыын аҕам саастаахтарбыт доруобуйаларын көрдүлэр, сүбэлэрин биэрдилэр, нэһилиэк олохтооҕо Изабелла Ивановна Данилова "Чэбдигирии" скандинавскай хаамыыны иилээн-саҕалаан ыытта. Декаданы түмүктүүр тэрээһин алтынньы 10 күнүгэр буолла. Бу күн, үгэс курдук, Уолба нэһилиэгин аҕам саастаахтара уонна пенсионердара мустан, үөлээннээхтэрин кытта көрсөн, ирэ-хоро кэпсэтэн, араас конкурстарга кыттан үөрэн-көтөн тарҕастылар. Төһө даҕаны уот суох буоллар, биһиги нэһилиэкпит ытык дьоно эрдэттэн биллэриллибит конкурстарга олус көхтөөхтүк кытыннылар. 

Күндү дьоммут күннэтэ сүбэ-ама, күүс-көмө буола сылдьар кырдьаҕас эбэлэрбитин-эһэлэрбитин, ийэлэрбитин-аҕаларбытын, кинилэр сылайары да аахсыбакка үлэлээн дойду олоҕун тутуспуттарыгар, сайдыыны түстэспиттэригэр сүгүрүйэн туран   барҕа махталбытын тиэрдэбит! Орто туруу-бараан дойдуну өссө да үгүс сылларга сүһүөххүт үрдүгэр сылдьан тупсара, сүбэ –өйөбүл буола, ыалдьыбакка этэҥҥэ сылдьаргытыгар баҕарабыт !