Таатта Уолбатыгар үҥкүү ситимэ быстыбат: «Көтө дайа, кустуктана!» үҥкүү бырааһынньыга 27-с төгүлүн дьону муста

Таатта улууһун Уолба нэһилиэгэр сылын аайы кэтэһиилээх «Көтө дайа, кустуктана!» үҥкүү бырааһынньыга үрдүк таһымнаахтык буолан ааста. Быйыл бу ураты тэрээһин 27-с төгүлүн тэриллэн, үҥкүү эйгэтин сэҥээрээччилэри уонна ыалдьыттары биир сиргэ түмтэ.

Көлүөнэ ситимэ уонна үҥкүү кэрэтэ
Бырааһынньык биир уратытынан кыттааччылар саастарынан хааччахтамматахтара буолар. Сыанаҕа үҥкүү алыптаах эйгэтигэр  уһуйаан (детсад) кырачаан оҕолоруттан саҕалаан,  элбэх уопуттаах, дириҥ ытыктабылы ылар аҕам саастаах көлүөнэ үҥкүүһүттэригэр тиийэ таҕыстылар. Көлүөнэ ситимин кэрэтин көрдөрбүт үҥкүүһүттэр көрөөччүлэр куттарын туттулар, сылаас ытыс тыаһынан уруйданнылар. Быйылгы бырааһынньыкка кыттааччылар дуэтынан уонна бөлөҕүнэн үҥкүүлэри толордулар. 

Быйылгы бырааһынньык үрдүк таһымын өссө биир ураты түгэн киэргэттэ. Тэрээһин ыҥырыылаах ыалдьыттарынан Ытык күөл нэһилиэгиттэн  сылдьар «Алдаана» ырыа уонна үҥкүү бөлөҕө буоллулар, салайааччы Николаева Зинаида Ильинична. Кинилэр бэйэлэрин ураты нүөмэрдэринэн көрөөччүлэри олуһун диэн сөхтөрдүлэр. "Алдааналар" талба талааннаах иистэнньэҥ Галина Семенова тикпит көстүүмнэрин кэтэн хас биирдии гүөмэрдэрин чаҕылхайдык толорон, көрөөччү кутун туттулар.

«Көтө дайа, кустуктана!» үҥкүү бырааһынньыга быйыл даҕаны сырдык иэйиини, сомоҕолоһууну уонна саха үҥкүүтүн сайдар кэскилин өссө төгүл бигэргэттэ.