Төрүт үгэһи утумнаан: Баайаҕаҕа туос иһит оҥоруутугар маастар-кылаас буолла

Баайаҕа нэһилиэгэ — уус-уран оҥоһуктар уонна төрүт үгэстэр биһиктэрэ. Бу күннэргэ манна анаан-минээн олус интэриэһинэй уонна туһалаах тэрээһиҥҥэ —туос иһит оҥоруутугар үөрэнэн  кэллибит. Маастар-кылаас  тимир ууһа, Таатталар киэн туттар киһибит  Борис Федорович  Неустроев-Мандар Уус кэнчээри ыччакка сатабылын тиэрдээри тэрийбит «Мандар кыһатыгар» буолла, иилээн-саҕалаан ыыттылар норуот уус-уран оҥоһуктарын маастардара Параскевья Петровна Бурнашева,  Наталья Ипатьевна Дедюкина уонна Галина Иннокентьевна Андросова. 

Тэрээһин сүрүн сыалынан — «Түмсүү төлкө төрдө» улуустааҕы бэстибээлгэ бэлэмнэнии уонна сахалыы мааны иһити-хомуоһу бэйэ илиитинэн оҥоро үөрэнии буолла. Маастар-кылаас кыттыылаахтара былыр-былыргыттан саха киһитэ күннээҕи олоҕор-дьаһаҕар туттар саамай күндү малын — чабычах, мэһэмээн  оҥоруутун кистэлэҥнэригэр уһуйулуннубут.

Туоһунан үлэлиир олус тулуурдаах уонна сыралаах үлэ. Бастатан туран, туоһу хайдах сөпкө хастыыры, ыраастыыры билиэххэ наада. Онтон саамай долгутуулааҕа — чабычах халыыбын таһааран, ситиинэн тигии буолла. Хас биирдии маастар-кылаас кыттыылааҕа бэйэтин илиитин сылааһын иҥэрэн, мааны көстүүлээх, тупсаҕай оҥоһуулаах чабычахтары, мэһэмээни оҥорон таһаарда.

Сахалыы иһит оҥоруута — бу судургу эрэ үлэ буолбатах, бу биһиги өбүгэлэрбит куттарын-сүрдэрин кытта ситим. Бэйэбит оҥорбут иһиппит "Түмсүү төлкө төрдө" бэстибээлгэ нэһилиэкпит аатын чиэстээхтик көрдөрүө диэн эрэллээх уонна салгыы бу дьарыгы сайыннарар санаалаах дойдубутугар кэлбиппит. Баайаҕа мааны маастардарыгар — туос иһит оҥоруутун кистэлэҥнэригэр уһуйбут күндү дьоммутугар, итии-истиҥ махталбытын тиэрдэбит! Эһиги көмөҕүтүнэн өбүгэбит иһитин тигэ үөрэнэн, төрүт үгэспитин салгыыр кыахтанныбыт. Айар куккут өрүү үрдүү турдун, илиигит сылааһа өссө да элбэх кэрэни айдын!

Маннык тэрээһиннэр төрүт үгэспитин  тилиннэрэллэр, эдэр көлүөнэҕэ үөрэх-билии буолаллар. Баайаҕа маастардарын илиилэрин иһигэр туос тыыннанан, кэрэ оҥоһук буолан тахса турара киһини эрэ үөрдэр. 

Саогыы хаартыскаларынан көр....