Улуустааҕы "Түмсүү- төлкө төрдө" кыайыылаахтары ааттаата. ​

Арассыыйаҕа норуоттар сомоҕолоһууларын, Саха Өрөспүүбүлүкэтигэр култуура, Таатта улууһугар Айар ситим сылларыгар туһуламмыт “ТҮМСҮҮ-ТӨЛКӨ ТӨРДӨ” нэһилиэктэр икки ардыларыгар ыытыллар бэстибээл  Уолба нэһилиэгэр кулун тутар 19 күнүгэр түмүктэннэ. Бэстибээл сүрүн сыала-соруга: Нэһилиэнньэ көхтөөх, түмсүүлээх, биир сомоҕо буолуутун ситиһии, уус-уран самодеятельноска, норуот айар айымньытыгар саҥа талааннары арыйыы, оскуола оҕолорун, эдэр ыччаты патриотическай тыыҥҥа иитии, норуот айымньытын бары көрүҥнэрин  сайыннарыы, таһымнарын үрдэтии. 

  Бэстибээл икки бөлөҕүнэн улахан уонна кыра нэһилиэктэр диэн ыытылынна. 

Бастакы хайысха үбүлүөйдээх суруйааччылар А.И.Софронов- Алампа5а, Д.К.Сивцев - Суорун Омоллооҥҥо, Н.Е.Мординов - Амма Аччыгыйыгар ананна.  Биһиги нэһилиэк саха норуодунай суруйааччыта Д.К.Сивцев-Суорун Омоллоон "Киһини туох киэргэтэрэ" испэктээги туруоран, артыыстарбыт бастакы холонууларыгар олус итэҕэтиилээхтик оонньоотулар. 

Иккис хайысханан "Ыалдьытымсах саха ыалын  сандалыта" быыстапка туруоруута буолла. Бу быыстапкаҕа ирдэбил быһыытынан саха иһитэ-хомуоһа уонна саха аһын арааһа турда. Бэстибээлгэ уран уустарбыт, иистэнньэҥнэр, уран тарбахтаах нэһилиэкпит олохтоохторо араас иһити-хомуоһу анаан оҥорбуттара улахан күүс буолла. Дьүүллүүр сүбэ быыстапканы көрөн саҥа ааттар тахсыбыттарын, сонун оҥоһуктар турбуттарын бэлиэтээтэ.   "Кэнчээри" уһуйаан коллектива олус баай сандалы тардан, уопсайа остуол муҥунан 42 араас көрүҥ бүлүүдэ астанна. 

Маны таһынан үһүс хайысханан Геобрендинг диэн нэһилиэк уратытын көрдөрөр видеоконтент уһулуута, таҥан оҥоруута буолла. Видео 4 хайысханан сыаналанна: ол курдук, нэһилиэк историятын, култууратын, айылҕатын уонна экономикатын сырдатар видеолар оҥоһулуннулар.

Төрдүс хайысха - норуот уус-уран жанрдарынан кэнсиэр.  

Кэнсиэргэ оскуола оҕолоро, улахан дьон кыттыыны ыллылар. Дьүүллүүр сүбэ түмүккэ Семеновтар дьиэ-кэргэн толорбут олоҥхоттон быһа тардыыларын, чабырҕахсыттары, үҥкүүһүттэри бэлиэтээтэ. Уопсай түмүккэ 147,66 балл ыллыбыт. 

Түгэнинэн туһанан фестивальга ис дууһаларын ууран көмөлөспүт нэһилиэкпит олохтоохторугар, кэнсиэр, быыстапка кыттыылаахтарыгар барҕа махталбытын этэбит. Эһиги бэйэҕит айар дьоҕургутунан, көхтөөх кыттыыгытынан бэстибээлбит таһымын үрдэттигит, дьон кутун туттугут. Баҕарабыт эһиэхэ ситиһиини, айар үлэҕит аартыга өссө кэҥии турдун. Кэлэр да сырыыга маннык түмсүүлээх буолуоҕун!