Сэтинньи 13 күнүгэр Сомоҕолоһуу күнүгэр туһуламмыт "Кыайыы туһугар бары бииргэ" тэрээһин буолан ааста.  

Норуоттар доҕордоһуулара, түмсүүлэрэ — дойдубут, өрөспүүбүлүкэбит бигэ тирэхтэниитэ.

Олохпут кэскилэ, сайдыыта биһиги, бары норуоттар истиҥ-эйэҕэс сыһыаннаахпытыттан, иллээх-эйэлээх, түмсүүлээх олохтоохпутуттан, ону кытта, дьон-сэргэ өбүгэлэрин үгэһин сэргииллэриттэн, хардарыта сэҥээрсэллэриттэн,  билэргэ-көрөргө дьулуһалларыттан эмиэ тутулуктаах.

 Дьэ, онон бу күн "Доҕордоһуу түһүлгэтэ" диэн үгэс буолбут түһүмэхпит араас норуоттар култураларыгар, кинилэр үгэстэригэр, сиэрдэригэр-туомнарыгар ананна. Маны тэҥэ анал байыаннай дьайыыга сылдьар биир дойдулаахпытыгар көмөлөһөр сыалтан атыы-тутуу дьаарбаҥката буолла. 

Үтүө тэрээһин саҕаланыыта нэһилиэкпит баһылыга олохтоохтору эҕэрдэлээтэ уонна  АБДь сылдьан сэрии толоонугар хорсуннук охтубут биир дойдулаахпыт Васильев Н.Е. ананан кэлбит "Орден Мужества" бэлиэни бииргэ төрөөбүт эдьиийигэр туттарда. 

"Доҕордоһуу түһүлгэтигэр" кыттыбыт тэрилтэлэр олус бэлэмнэнэн кэлбиттэр. Ол курдук аҕам саастаахтарбыт саха омук, Байанай ыйыгар тутуһуллар сиэр-туом туһунан, Оскуола учууталлара- хотугу аҕыйах ахсааннаах норуоттар, эдэр учууталлар- Татар омук, "Кэнчээри" уһуйаан коллектива - нуучча, оскуола оҕолорун хамаандата- Бурят омук буолан, кинилэр култуураларын, үгэстэрин,  сырдаттылар, ырыаларын-тойуктарын толордулар.  Тэрээһини дойду араас муннугуттан бэлэх буолан кэлбит Д.И.Винокурова куукулалара киэргэттилэр. 

Дьаарбаҥкаттан киирбит үп уопсайа 28975 солк киирэн "Туймаада Уолбалара" түмсүү салайааччытыгар Афанасий Имматуллович Андреевка туттарылынна.