Уолбаҕа тэрилтэлэр сыллааҕы үлэ былаанын билиһиннэрдилэр

Уолба нэһилиэгэр Россияҕа биллэриллибит Наука уонна технология, Республикаҕа уонна Таатта улууһугар – Доруобуйа сылын арыйар дьоһун тэрээһин буолан ааста. Тэрилтэ салайааччылара сыл устата ханнык тэрээһини былаанныылларын нэһилиэнньэҕэ быһа эфир нөҥүө иһитиннэрдилэр. Оскуола коллектива нэһилиэккэ бастакы кыраайы үөрэтэр музей тэриллибитэ 95 сылынан Прокопий Харлампьевич Андросов- Дьөҥкү Сээн аатынан “Иэйии” айымньы музейын баай фондатын цифровой оҥорон виртуальнай музей гына оҥорор былааннаахтарын кэпсээтэ.
ФАП салайааччыта Мария Иннокентьевна Никонова сыл устата дьон доруобуйатын бөҕөргөтүүгэ туһаайан лекциялары, беседалары ыытар былааннаахтарын, аҕам саастаахтар түмсүүлэрин кытта ситимнээх үлэни тэрийэллэрин иһитиннэрдэ. ОДьКХ маастара Тимур Эдуардович Басов саас оҕо аймах сибиэһэй салгыҥҥа дуоһуйа оонньоон доруобай буоларыгар күөлгэ каток оҥорорго коллективынан быһаарыммыттарын уонна нэһилиэк ыраас буоларыгар үлэлэһэллэрин эттэ. Ветучасток сэбиэдиссэйэ Зинаида Иннокентьевна Слепцова саха дьоно төрүт иҥэмтэлээх аһынан тото-хана аһаан сырыттаҕына эрэ тыйыс айылҕабытын тулуйар, доруобай буолар кыахтааҕын, онон үгүс үүт ыанарын, эт баар буоларын наадатыгар сүөһүбүт доруобай буолуохтааҕын, вакцинацияны кэмигэр оҥорууну ситиһиэхтээхтэрин биллэрдэ. Норуот айымньытын киинин директора Анастасия Сергеевна Боппосова олохтоох нэһилиэнньэни телефон араас программаларыгар, өҥөнү сатаан оҥорууга үөрэтэри, доруобуйа сылынан көлүөнэлэринэн араас эрчиллиилэри, хамсаныылары оҥотторуохтаахтарын, ону таһынан тематическай тэрээһиннэри былаанныылларын сырдатта. Нэһилиэк дьаһалтатын баһылыга Александр Афанасьевич Винокуров спорт инструкторы кытта дьон чэгиэн туруктаах буоларын туһугар араас спортивнай күрэхтэһиилэри сыл устата ыытар былааннаахтарын кэпсээтэ.
Бу курдук үөрүүлээх тэрээһиҥҥэ иһиллибит ыра санаа инникигэ эрэли, олоххо сыал-сорук туруорунууга түстээтэ. Дьоро киэһэни Норуот айымньытын киинин үлэһиттэрэ уонна “Дьэҥкир алып” айар түмсүү тэрийэн ыыттылар.

 

Категория: Мои статьи | Добавил: uolba_ksk (05.02.2021)
Просмотров: 380 | Рейтинг: 0.0/0
Всего комментариев: 0
avatar
close