11:22
Өлбөт сүппэт полк

 

 

Өлбөт-сүппэт полк хаамар.

Күммүт кытта күлүмүрдүүр,
Күлэн-үөрэн чаҕылыйар
Кыайыы Күнүн уруйдаан,
Кыайыы Күнүн айхаллаан.
Хаартыскаҕа хатанан
Хаамыстылар геройдар,
Халыҥ кэккэ буоланнар
Халҕаһалыы усталлар.
Манна бааллар чугас дьоммут,
Өлбөөдүйбэт өйдөбүлбүт,
Тэбэр сүрэх сылаас хаана,
Хаан уруубут-аймахпыт.
Харах уулаах бырааһынньык
Хайдах кэлтин биллиннэр,
Кэнэҕэски ыччаттар
Кэриэстээннэр хаамтыннар.
Өйдөөҥ хайдах сыананнан
Өрөгөйбүт үүммүтүн,
Дьоллоох олох тускута
Дьоллоһуйа устарын!
Толук буолбут олохтор
Туман буолан көппөттөр,
Хас биирдиибит сүрэҕэр
Хатаналлар бигэтик!
Өрөгөйдөөх күммүтүгэр
Өлбөт-сүппэт полк хаамар,
Өйдүүр-ахтар тухары
Өрүү маннык хаама туруо!

 

 

 

 

Просмотров: 484 | Добавил: uolba_ksk | Рейтинг: 0.0/0
Всего комментариев: 0
avatar
close