Кыыһар аалай Кыайыы Знамята бүгүн Таатта улууһун сирин-уотун булан, улуус олохтоохторун үөрүүлэрин өрөгөйө буолла. Сарсыарда «Таатта-Чурапчы» кыраныыссатыгар ыаллыы сытар чулуу дьонноох Чурапчы аҕа баһылыга Степан Анатольевич Саргыдаев салайааччылаах халыҥ хамаандата Тапталлаах Тааттабыт дьонугар-сэргэтигэр үөрүүлээх быһыыга-майгыга илии илииттэн улууспут аҕа баһылыгын э.т. Руслан Игнатьевич Захаровка туттарда. «Кыайыы өрүү баар буолуо» диэбиттии сарсыардааҥҥы салгыҥҥа тэлибирии охсуллан инники олоххо эрэли саган мустубут дьон сөҕүүтүн сөргүттэ. «Быйыл дойдубут үрдүнэн Аҕа дойдуну көмүскээччилэр, Республикаҕа Ийэ дойдуну көмүскээччилэр уонна улууспутугар Кыайыы сыла биллэрилиннэ. Бу үтүөкэннээх дьаһаллар билиҥҥи кэмҥэ олус суолталаахтарын хас биирдиибит чопчу билэр уонна билинэр. Билигин Дойду үрдүнэн ыарахан түгэннэр бүрүкээн турар кэмнэригэр Көмүскээччи диэн тыл икки бүк күндү. Хайдахтаах да түгэҥҥэ дойдуга, дьонно-сэргэҕэ таптал барытын куоһаран үтүө олох кэлэрин туоһута буолар» диэн киһи дууһатын кылын таарыйар үтүө тылларынан Руслан Игнатьевич саҕалаан тоҕуоруһа мустубут дьону уйадытта. Таатта улууһа Кыайыы Знамя сырдык өйдөбүлүн, ыччаттары патриотическай тыыҥҥа иитиитин суолтатын табатык өйдөөн кыралыын-улаханныын, барыта 50-ча киһи бу үөрүүлээх тэрээһиҥҥэ кытынна. Алгыстаах алаастардаах Тааттаҕа бу күн икки туһунан, ол эрэн биир сүдү өйдөбүллээх, Улуу Аҕа дойду сэриитин кыайыытын туоһулара—Кыайыы Знамята уонна «Мурманск--Певек» маршруттаах айаннаан иһэр РФ ыксаллаах быһыы-майгы министерствотын чэрчитинэн ыытыллар акциянан Умуллубат уот (Вечный огонь) кэллиллэр. Этиллибитин курдук, тус туспа тэрээһиннэр биир күҥҥэ тиксибиттэрэ, биһиэхэ, таатталарга, элбэх эппиэтинэһи уонна эрэли сахта.