Бу күннэргэ,  Уолбабыт нэһилиэгиттэн кынат үүннэрэн тахсыбыт, бүтүн өрөспүүбүлүкэҕэ киэҥник биллибит биир дойдулаахтарбыт,  бэйиэт, тылбаасчыт, Аҕа Дойду Улуу сэриитин саҕана лейтенант, зенитнай рота хамандыырын солбуйааччыта, Кыһыл Сулус уордьан кавалера Макар Иванович Кузьмин -  Макар Хара,  саха биллиилээх ырыаһыта, ырыа айааччы, саха оператын бастакы үөрэхтээх режиссера? Cаха АССР, РСФСР народнай, Саха АССР үтүөлээх артыыската Анна Ивановна Егорова уонна Саха театра сүһүөҕэр туруутугар төһүү буолбут бастакы баайыы артыыстартан биирдэстэрэ, Саха АССР, РСФСР үтүөлээх, саха АССР народнай артыыската Дарья Даниловна Слепцова төрөөбүт, олорон ааспыт алаастарыгар бэлиэ туруорулунна. 

Бу бырайыак  идеятын норуот айымньытын киинин үлэһиттэрэ толкуйдаабыппыт. Сүрүн сыала буолар кэнэҕэски ыччаттарбытыгар Уолбабыт нэһилиэгэ хайдахтаах курдук ааттаах-суоллаах дьонунан баайын, кинилэр нэһилиэктэрин аатын билигин да ааттата туралларын билиһиннэрии, өйдөтүү буолар. Салгыы улууска көмүскэнэн, бырайыак олоххо киирэригэр улуустааҕы норуот айымньытын дьиэтэ (оччолорго сал. Вырдылин Г.Г.) биһирээн 10000 солкуобайынан наҕараадаламмыппыт.  

Быйыл Арассыыйаҕа уонна Саха сиригэр Улуу Кыайыы 80 сылыгар бу бэлиэлэр турбуттара ордук суолталаах буолла. Бырайыакпыт өссө даҕаны инникилээх буолуо диэн бигэ эрэллээхпит. 

Махтанабыт көмө-тирэх буолбут дьоммутугар нэһилиэкпит баһылыга В.П. Рахлеевка, бырайыак саҕаланыаҕыттан бииргэ үлэлэспит салайааччыбытыгар  А.А. Винокуровка, Уолбабыт ыччатыгар Айтал Семеновка, бырайыак суруллуутугар сүбэ буолбут наставникпытыгар С.Р. Мосоркинаҕа.